2024 LPL තරඟාවලියේ අවසන් මහා තරඟය ඊයේ (21) කොළඹ ආර්. ප්‍රේමදාස ක්‍රීඩාංගණයේදී පැවැත්වුණු අතර ගෝල් මාර්වල්ස් කණ්ඩායම පහසුවෙන් පරාජයට පත්කරමින් සිව්වන වරටත් LPL ශූරතාවය හිමිකරගැනීමට චරිත් අසලංකගේ නායකත්වයෙන් යුත් ජැෆ්නා කිංග්ස් කණ්ඩායම සමත්වුණා.
තරඟයේ පළමුව පන්දුවට පහරදුන් ගෝල් මාර්වල්ස් කණ්ඩායම පන්දුවාර 20 අවසානයේ කඩුලු 06 කට ලකුණු 184 ක් රැස්කළා. ගාල්ල ඉනිමේ නැංගුරම බවට පත්වෙමින් භානුක රාජපක්ෂ පන්දු 34 කින් වේගවත් ලකුණු 82 ක් රැස්කළ අතර ටිම් ශෙයිෆර්ට් පන්දු 37 කින් ලකුණු 47 ක් රැස්කළා.
පිළිතුරු ඉනිම ක්‍රීඩාකළ ජැෆ්නා කිංග්ස් ඉනිමේ පළමු කඩුල්ල පළමු පන්දුවෙන්ම දැවීගිය අතර ඉන් අනතුරුව කුසල් මෙන්ඩිස් සමඟින් එක්වූ රයිලි රූසොව් නොබිඳුණු ලකුණු 185 ක සබඳතාවයක් ගොඩනඟමින් ජැෆ්නා කිංග්ස් ජයග්‍රහණය තහවුරු කළා. කුසල් මෙන්ඩිස් සහ රයිලි රූසොව් සමඟ එක්ව ගොඩනැඟූ මෙම සබඳතාව වාර්තා අතරට එක්වුණේ LPL තරඟයක ඕනෑම කඩුල්ලකට ගොඩනැඟූ ඉහළම සබඳතාවය ලෙසයි.
LPL තරඟාවලියේ වාර්තා වූ ඉහළම සබඳතාවයන්
සුපිරි ඉනිමක් දියත්කරමින් රයිලි රූසොව් විශිෂ්ට ශතකයක්ද සමඟින් පන්දු 53 කින් නොදැවී ලකුණු 106* ක් වාර්තා කළා. මෙම ශතකයත් සමඟින් ඔහු වාර්තා අතරට එක්වුණේ එක් LPL තරඟාවලියක් තුළ ශතක දෙකක් වාර්තා කළ පළමු ක්‍රීඩකයා ලෙසයි. ඔහුට නොදෙවෙනි ඉනිමක් දියත්කළ කුසල් මෙන්ඩිස් පන්දු 40 කින් නොදැවී ලකුණු 72* ක් රැස්කළා.
තරඟයෙන් අනතුරුව මෙවර LPL තරඟාවලියේ විශිෂ්ට දස්කම් දැක්වූ ක්‍රීඩකයින්ට සම්මාන පිරිනෑමූ අතර,
අවසන් මහා තරඟයේ වීරයා ලෙසින් රයිලි රූසොව් ( USD 1500 )
තරඟාවලියේ වීරයා ලෙසින් රයිලි රූසොව් ( USD 5,000 )
තරඟාවලියේ නැඟීඑන ක්‍රීඩකය ලෙසින් චමිඳු වික්‍රමසිංහ ( USD 1500 )
තරඟාවලියේ වැඩිම කඩුලුලාභියා ලෙසින් ශඩාබ් ඛාන් ( රතු පැහැති හිස්වැස්ම – 17 Wickets )
තරඟාවලියේ වැඩිම ලකුණුලාභියා ලෙසින් ටිම් ශෙයිෆර්ට් ( රෝස පැහැති හිස්වැස්ම – 400 Runs )
සම්මාන දිනාගත්තා..
තරඟාවලියේ අනූශූරතාවය දිනාගත් ගෝල් මාර්වල්ස් කණ්ඩායමට අමෙරිකානු ඩොලර් 50,000 ක මුදල් ත්‍යාගයක් සහ
ශූරතාවය දිනාගත් ජැෆ්නා කිංග්ස් කණ්ඩායමට ඇමෙරිකානු ඩොලර් 100,000 ක මුදලක්
පිරිනැමුවා…
